SAKECLAK CITANGIS (CARPON SUNDA)

Ceuk paribasa “halodo sataun lantis ku hujan sapoe. Mangsono mangtaun taun cageur ku tepung sapoe. Kakeuheul nu sakumaha gedena leungit ku sakeucap hampura”.

Kuring nu salah. Sanajan nyoba neangan nu rek ngabela, angger kuring nu salah. Teteh lanceuk kuring sama sekali teu nyahoeun. Nya kajadian naon anu tumiba ka kuring, adina. Adi nu ngan hiji-hijina. Adi anu saurna kacida di areup-areup sakulawarga. Adi anu kacida dipikanyaahna ku Teteh. Tapi bet jadi adi anu teu boga perasaan. Kuring nu salah.

Saur dongeng Ema, Teteh teh disangka rek nunggal. Geus umur ampir lima taun, tacan wae katinggal rek raian. Ema jeung Bapa henteu ngaraos hemeng, da Teteh kakara gelar kadunya, dina yuswa pernikahan aranjeuna nu kalima. Padahal boh ti Ema boh ti Bapa, papanda “rendey”. Bapa kagungan saderek salapan, Ema sawelas tapi pupus dua nuju orok keneh. Sanajan ti duaan, Emang jeung bibi teh harita mah kari setengahna deui. Sawareh tos ngantunkeun.

Sanajan adi lanceuk pet ku hinis, kuring jeung Teteh kacida bedana. Boh dedegan, boh kalakuan estu teu ngaharib-harib adi lanceuk. Teteh salirana alit, pakulitan hejo carulang, ari kuring jangkung, pakulitan bodas, Teteh lungguh, timpuh, tara seueur carios, ari kuring lincah, resep ngobrol resep ulin. Malah saur Ema keur budak mah rada jalingkak. Tomboy meureunan.

Minangka anu sarua teh panon jeung irung. Sarua ngala ka Ema jeung Bapa. Soca Ema ceureuleuk, ari pangambung, Bapa anu mancung. Ari buuk mah beda, kuring jocong ngala ka Bapa ari Teteh galing muntang siga rambut Ema. Ku lantaran Ema jeung Bapa kagungan usaha, kana toko sembako jeung matrial katut heleuran beas, kuring gede jeung Teteh katut pangasuh, da aranjeuna sibuk di tempat usaha tea. Kalan kalan dibawa ka toko ku Bapa atawa ku Ema.

Kaka teh urang lembur tatangga, kahalangan ku salembur. Ngan sakola ti kota jeung eyangna ti rama. Basa mulang ka lembur, tepung jeung Teteh. Teu kaciri hahadeanana ge, bubuhan Teteh mah lungguh, tara cuih kawas kuring. Nyaho-nyaho kaka rek ngalamar, sanajan kuliah keneh.

Basa si kaka, ngalamar, kuring sakola keneh di SMP. Teteh nikah dina yuswa 20 taun, kaka 22 taun, ari kuring kakara 15 taun. Bubuhan putra cikal, Bapa sareng Ema hajat enyaan. Malahan nanggap jaipongan jeung dangdutan sagala. Beurangna resepsi, peutingna hiburan. Ibur atuh salembur ge, panganten meni nurubcepu nu geulis nyanding nu kasep. Ongkoh juru riasna ge nu geus kasohor. Seep kapanuju Bapa ka kaka teh, kasep, sopan, nyantri jeung pinter.

Ngan saminggu ti tas pangantenan Teteh dilembur teh. Da saterusna diboyong ku kaka ka kota. Kuring ceurik eueurihan. Asa rek dicabut nyawa. Atuda ti bubudak di asuh ku Teteh, tara pisah. Ari ayeuna anjeuna ninggalkeun. Meunang saminggu kuring numpi we dikamar, inget wae ka Teteh, sanajan geus usum HP, tapi mimindengan namah gejed da sok mindeng taya sinyal. Pikeun ngalelemu hati tina kasono, kuring sok nelepon, ari sono-sosno teuing mah kuring sok ngahagal ka kota jeung Ema. Teteh bingaheun pisan dilongok teh.

Ngan dua kali tepi ngendong mah. Sakali basa kaka wisudaan, marengan Teteh ka kampus. Kadua kalina basa Teteh orokan ku nu cikal. Etamah aya samingguna maturan Ema. Kabeneran kuring kuringna keur libur panjang. Sanajan betah keneh jeung libur aya keneh, kuring kudu balik, ngagentenan padamelan Ema di lembur. Teteh can ludeungeun ditinggalkeun ku Ema ngurus orok.

Kasedih pisah jeung Teteh rada kabangbrangkeun basa kuring geus ka SMA. Aya tetenjoan ka jajaka, sanajan masih keneh semet leuleupeutan leuleumeungan. Tapi basa lulus ti SMA mah mimiti rada serieus. Aya kang A anu ngeusian hate, kacinta teh asa geus di tamplok keun ka manehna. Malah geus ngukir impian pikahareupeun mun pareung hirup paduduaan teh teh.

Tapi hareupan teh peunggas basa hiji mangsa manehna nyarita, geus dijodohkeun ka mojang anu masih keneh katalian ku babarayaan. Ceunah teu bisa ngejat, da indungna geus neundeun jangji ka indung eta awewe, rek bebesanan. Ongkoh Bapana kahutangan budi ti bareto keneh. Kuring teu bisa narima alesan maneh na, angger nyeri hate. Kabeneran lembur kuring padeukeut jeung leumbur eta awewe teh. Basa manehna rek pangantena kuring “kabur” ka Teteh.

Heunteu cacarita ka Teteh mah yen kuring keur patah hati. Anjeuna bungaheun da kabeneran geus bulan alaeun ku putrana nu kadua. Kuring jeung Ema nungguan Teteh. Tapi basa Teteh geus salamet ngalahirkeun orok, Ema mulih da seueur padameulan. Kuring kapapancenan maturan maturan Teteh ngasuh Si Cikal. Kaka pulang anting ka rumah sakit, tepi ka Teteh mulih ka bumi.

Kabeneran ku Teteh di andeug maturan. Ku Si Kaka mah kuring di hatean kuliah, tapi teu purun. Mending ngiluan kursus kecantikan wae, rek muka salon jaga di lembur, ceuk kuring. Ku Teteh di titah daftar ka hiji salon kageulisan nu kajojo. Nya didieu mamala teh datangna. Teuing kumaha mimitina, kuring jadi resep ka Si Kaka. Kaciri anjeuna teh awet ngora, malah asa beuki kasep wae. Tina resep aya rasa nu sejen lamun sakalina paamprok teuteup.

Sanajan teu neupi ka ngalakukeun pagawean nirca, kuring tetep ngarasa dosa. Dina hate anu pengjerona aya rasa hayang ngarasaan nimatna cinta. Rumasa ngahaja ngagoda Si Kaka. Kuring nu keur sumedeng mekar, ari lanceuk kakara hudang ngajuru. Kawas rek kagoda salaki lanceuk teh. Peuting harita balik les, kuring dijemput ku kaka kana motorna sakalian mulih ti kantor. Leungeun nangkel kana cangkengna, kalah terus dicekel ku Si Kaka.

Ngan salengkah deui kajadian angkara murka teh bakal karandapan. Tapi kaka sadar, terus istigfar. Isukna kuring terus purat perot balik ka lembur. Era, kudunamah kuring nu sadar teh. Hoream tepung, kuring ngilu ka bibi, raina Ema di kota B. Akon-akonna hayanng neruskeun les kecantikan, bari praktek, da bibi muka salon, meunang tilu taun ti ditu. Teteh mindeng neleponan, sono cenah, tapi sabisa-bisa ku kuring tara ditembalan, nyebut sibuk we.

Lebaran taun ieu mah kuring kudu mulang, da geus dua taun teu silaturahmi. Teu kaampeuh kuring ngarangkul ka Teteh. Kasono anu sakitu lilana asa cageur ku usap deudeuhna. Sanajan heunteu cacarita, kuring yakin Teteh uningaeun kana kalakuan kuring. Anjeuna surti kunaon kuring “kabur ngajauhan. Sakeclak citangis ngabarung harewos deudeuh, asa nyageurkeun hate tina rasa dosa anu sakitu lilana nyangkruk dina hate nu pangjerona. Saeunggeus kuring rarabi, leungitna pisan mah rasa era teh.

source.Galura

XXX damn

saya hanya seorang individu yang sedang memahami arti dari sebuah kehidupan, belajar akan manis dan pahitnya dunia dan merasakan arti dari sebuah keluarga dan sahabat tentunya seorang kekasih yang kelak akan jadi ibu dari anak-anak saya.

Bagikan Artikel ini