CONTOH GUGURITAN

CONTOH GUGURITAAN  1

ASIH INDUNG

(Resmiati)

Nelengnengkung asih indung

Nu ngayuga beurang peuting

Beurang dijaga kamelang

Peuting dijaring kaeling

Muga manja dina beurang

Muga eling dina peuting

                        Nelengnengkung muga nanjung

                        Indung nu ngaping ngajaring

                        Masing bisa ngawang-ngawang

                        Ngalingling di inidung peuting

                        Ngalanglang di mega malang

                        Ngapung dilangit awaking

Anaking ketug jajantung

Getih indung anu wening

Napas ema anu herang

Ulah rek rungsing ku peuting

Siga tahan ku panas beurang

Dunya pinuh ku tarucing

                        Hidep kudu bisa neguh

                        Eusina masing kapanggih

                        Hidep teh geura tatahar

                        Keur bekel dialam lahir

                        Sing bisa muka siloka

                        Warisan ti nini aki

                                                Hirup lir tumpak parahu

                                                Nu ngangkleung tengah jaladri

                                                Nataran ombak sagara

                                                Mun bisa ngajaga diri

                                                Hidep mo katalangsa

                                                Bisa waluya walagri

(Sumber. Buku guguritaan, penerbit Kiblat, tahun 2011, hal. 115)

CONTOH GUGURITAAN 2

NIMAT TEUING CAI JAMJAM

(Yus Rusyana)

Herang teuing cai jamjam

Diuyup karasa tiris

Meni nyecep kana badan

Nyerep kana tulang sendi

Saregot tambah deui

Mepes kesang anu juuh

Lantaran leumpang gancang

Urut tawap ujag-ijig

Awak seger karasa jagjag waringkas

Nimat teuing cai jamjam

Pusaka nabi Ismail

Jeung Ibuna Siti hajar

Anu halabhab nunggeulis

Turun milari cai

Ka lengkob batu taringgul

Ihtiarna ijabah

Tina lemah bijil cai

Cai jamjam sapanjang jaman teu saat

Ku bagja teuing jamaah

Nu kiwari munggah haji

Tinggal regot mun hanaang

Teu hese neangan cai

Teu kudu nimba deui

Cai jamjam ngocor ngucur

Diinum juta jalma

Dibekel ka mana mendi

Dibaroro ku sadaya kadang warga

Ku deudeuh teuing Pangeran

Ka mahluk teu pilih kasih

Nyuguhan ku kanimatan

Nimat rasa cai wening

Sareng sadia deui

Cawisan du’a nu nginum

Elmu anu mangpaat

Reujeung kajembaran rijki

Cageur bageur nugraha kawalargian

Sumber. Buku Guguritaan Munggah Haji karangan Yus Rusyana, Penerbit CV. Geger Sunten Bandung Tahun 1995. Hal. 28-29

XXX damn

saya hanya seorang individu yang sedang memahami arti dari sebuah kehidupan, belajar akan manis dan pahitnya dunia dan merasakan arti dari sebuah keluarga dan sahabat tentunya seorang kekasih yang kelak akan jadi ibu dari anak-anak saya.

Bagikan Artikel ini